Masinueob-on nga Huebes ag Biernes Santo
By Felimar Blanco/Houston, TX
siagnon@hotmail.com

Nakarang gabi-i, Huebes/Biernes Santo, ka’t mga napueo tubtub katorsi dag-on rong gueang ko, masako nga gabi-i ra kakon. Mangbahoe rong responsibilidad ko, ag mabudlay, sa daywang gabi-i ngara.

May motor o generator kami kung una, mga ginagamit anay ni nanay sa pangueong it buhok. (Beautician kabay si nanay kung una!) Imaw man sanday Tay Ago Angeles, nga sa tabok it karsada tungod it among baeay. Ginagamit nanda ro andang generator sa sound system.

Kon Huebes ag Biernes Santo ron, hay may mga lima o an-om ron kami ka pasos sa prosesyon, nga ginaiwagan. Ro mga an-om ngaron ka pasos dapat, sa prosesyon, hay nagasueoeonod. Kami ron responsable sa mga iwag it harong mga pasos. Ako ro responsable sa tatlong pasos nga ginaiwagan it amon nga generator. Ro generator, ginakarga sa nahatunga nga pasos.

Kasamihan, indi pareho ro daeagan it tatlong pasos ngara. May kon amat nagahinay, may kon amat man nga nagadasig - sari-saring dahilan. Mahimo nga nagaeagas it sa unahan, o nagahueat it gasunod o dahil man sa kabug-aton it mga pasos. Batsihon pa rong karsada.

Ako ro sa tunga-tunga nga nagahaeaw-tugot it alambre (it koryente) nga para sa mga iwag it pasos. Kon madasig ro sambato hay tugotan ko ron, kon indi, mabugto ro alambre pagnahugot – patay ro iwag it pasos nga natungdan. Kon mageapitay man ro daywang pasos ron hay haeawon ko man ro alambre ay kon indi hay taeapakan it mga tawo nga nagaprosesyon. Eani haeaw-tugot ro ang obra.

Hato man sa unahan ko si Roman Paki (onga ni Tay Ago), nagahaeaw-tugot man it tatlong pasos. Nagadagon-dagon man ro paki paagto-pabalik. Anang magueang nga si Tawi ro responsable sa daywang motor. Simple eang kay Tawi nga obligasyon dahil owa nagabisyo ro motor tubtub matapos ro prosesyon.

Daywang gabi-i ron. Huo, bilog ro buean sa daywang adlaw ngara kada dag-on, pero mayad eang kon mayad-ayad ro tiempo – kon amat man nagauean sa kuaresma, ag kon amat, sobrang init!

Abaw man nga trabaho ‘to. Kahaba-on pa abi ro ginaprosesyonan. Mayad si Hesus sa karo, ako ... sa Elpo. Ta-o eang kon nadiparahan ni Kristo Hesus, pero indi eang Imaw ro nagapenitensya - tatlo kami - Imaw, si Kristo Hesus, (sa karo ni Nay Bading Ong – nga "Penitensya"), si Paki ag ako! Imaw ron kon pam-an it masinoeob-on rong Huebes ag Biernes Santo!

Nabaid gid man ako sa trabaho bisan onga pa ako ... Owa pa ako it masamitan sa ginabayad kay nanay. Di bali pinadaea man nana ako sa kolehiyo - matsa Pasqua Domenica Felice man guihapon ro akong pamatyag hasta makaron!

Pero, mayad pa ro akong obligasyon ka’t high school ako – nagapatangyaw it gas (kerosene) kon Martes idto sa among tindahan! Tig-25 centavos ro litro! Gasakit man ro ang likod it binuktot ka’t nagapatueo it gas. Madaeagan pa ron dayon sa eskuelahan - balik sa klase - mabaho it gas!

Nakatimawas guid man ....

o-oo-o0o-oo-o
Happy Easter